Beschrijving
Al 50 joar! Nen halven eeuw Kreenk vuur de Twentse Sproak (KTS). Het mos eagenlijk neet neudig wean. Mear toch good dat een Kreenk der al dee 50 joar was; dé officiële vereniging den vuur de Twentse taal opkoomp en promoot as de echte taal van Twente. Een Kreenk gong duur alle stormen hen.
En der was heel wat slecht wear. Iezig weend van dale-kieken op alle streektalen. Skroa tieden van gin andacht vuur de regio. Koonkelderieje roond een Twentehoes en wier de melk optrekken. En nit te vergetten, binnen in een Kreenk zelf: gedister, gewossel en gekleai oaver alwier ne nóg bettere schriefwieze.
Honder leu, honderd zinnen… ’n Kreenk hooldt al dee leu biej mekoar. ’n Kreenk hooldt de leu vaste met allemoal een woarm geveul vuur het Twents, as ne eenheaid met an de binnenkaante van alle kluren. As ne familie dee nen hoop van mekoar köant hebben, juust umdat ze familie zeent.
Least dit book. Dan wee’j wat ’n Kreenk is. Al 50 joar!
Gerrit Dannenberg Marlies Nijhuis Alie van der Veer Joop Weber
